（建議先閱讀【小知/小我】一文，再連貫此文作整體理解，會更易消化箇中信息呢）
1. 瑜伽是「真知」
「瑜伽」係一套真知哲理，終究助人循序漸進地了解真我，擺脫憂苦的。
學瑜伽，無論為靚、減肥、瞓得好、少啲便秘、好奇，為乜都好，理論上都係為唔同程度嘅身心靈健康/自由而學的。
練心，係瑜伽練身嘅目標。一大類阻住身心靈自在嘅「苦」，喺瑜伽觀入面，稱為「我執」，即係是自以為是嘅執迷與依戀。
所以，學瑜伽其實係一條實實在在，學習「斷除我執」、「無我」嘅路。
2. 修習瑜伽的原意
瑜伽（真知）虛心學、踏實練，心理上/心靈上理應：
- 心愈來愈輕盈/愈少執著與感情用事
（因為睇到事物嘅本質不分好壞，多了包容與明白，少了喜惡的批判）
- 眼光愈來愈透徹/愈少睇唔開嘅煩惱
（客觀透視事物整體）
你係用咩心態去學瑜伽呢？有唔小心將瑜伽當成「小知」咁學嗎？
3. 誤把瑜伽當成「小知」是危險又是浪費
不幸地，當真將「真知」當「小知」咁用的話，「我執」會因膨脹嘅「小我」而發大。傷害係無法計算地累積的。
愈學，眼光與心胸不但會愈來愈狹窄，同維持身心靈健康嘅初心，亦背道而馳。
3.1 舉例說明：
瑜伽老師「善意的提點」與純粹「發洩的單打」 只是一線之差
有唔少人自覺學有所成後，都有一種「我勁過你」嘅沾沾念頭。
一個唔小心唔見咗個初心，個人就變囂張，就會好易出口術用「學識」嚟誇耀自己、攻擊別人，引起不必要嘅是非爭辯。
以瑜伽教學為例：
以瑜伽教學為例：
小明學瑜伽10年，都開始咗教班一段時間，都有啲學生。小明覺得學生做到一字馬就係進步嘅表現。
有日，小明見到一個跟佢學咗2年瑜伽嘅學生，喺練習一字馬時嘅表現，覺得唔滿意。小明同學生講：「你學咗咁耐，連個一字馬做到咁樣。你到底有冇認真學瑜伽㗎？」
睇到呢度，大家覺得，小明係出於善意嘅提點，想激勵學生，還是純粹因為唔滿意學生嘅表現而發脾氣呢？
可以從以下幾個方向去睇：
可以從以下幾個方向去睇：
1. 小明覺得，一字馬係學生瑜伽進度嘅指標。
2. 小明唔滿意，一個學咗兩年瑜伽嘅學生，一字馬嘅表現。
3. 從小明對學生講嘅說話中，顯示小明覺得學生該次一字馬表現，反映出學生冇認真學瑜伽。
睇到小明純粹困喺「小我」嘅主觀思維模式嗎？
思維謬誤
1. 一字馬唔係唯一學瑜伽進度嘅指標。（嚴格上可以話完全唔係！）
2. 學生一字馬嘅表現本來不分好壞，只係小明自覺不滿。
3. 一字馬嘅表現，同有冇認真學瑜伽，並唔係相對嘅因果關係。
被情緒說話
呢度示範嘅，就係小明被不悅嘅情緒沖昏頭腦，又自覺自己喺學生之上，而衝口而出嘅小知。
純粹鬧人做唔好佢心目中嘅一字馬，對學生其實係冇營養又冇幫助的。（太壞🔪）
學生聽到呢番說話，除咗唔開心同自責，其實冇咩黃金從小明口中得到。聽完連最小事嘅一字馬都唔會做得好咗。
而小明嘅自我同執著，卻又一次壯大。
3.1 《瑜伽經》的律戒，提醒著瑜伽修習者的初心
《瑜伽經》提到的「八肢瑜伽」（瑜伽修行步驟），頭兩肢「夜摩Yama」、「尼夜摩Ni-yama」正係教導瑜伽修習者/生而為人，應有嘅心態同規範。
第一肢Yama提到嘅五條律戒：「非暴Ahimsa」、「實語Satya」、「非盜Asteya」、「梵行 Brahmacarya」、「非縱 Aparigraha 」正正警惕著此。
- 非暴Ahimsa：瑜伽觀中，唔止係對別人大打出手呢種先叫暴力，呢度指嘅「唔傷害」係包括埋自己內在心念、言語、行為上嘅非暴力。
- 實語Satya：身（行為）、語（言語）、意（意念）三方都對自己、別人，真誠。
- 非盜Asteya：「唔偷取」、「唔侵佔」嘅意思。不止於外在行為，更是心念上的注意。
（人被佔有欲熏心，會生起「唔夠」嘅念頭，伴隨嫉恨、「想要多啲」嘅貪念。培養自足嘅心態，係對治嘅良藥。） - 梵行 Brahmacarya：唔被感官欲望牽著走。
（唔係要壓抑欲望嘅意思，係學習知道感覺之樂短暫而不可靠，不低覺知地受欲望控制。）
- 非縱 Aparigraha：對「擁有」嘅一切不依戀/執著。
（例如：情愛中中毒般嘅自我情緒勒索：「我冇咗你唔得㗎，我會生存唔到㗎」。過多嘅不捨同依戀，往往令人陷入困境。）
4. 反思：你我一路走來的瑜伽
學返嚟嘅瑜伽知識，有消化成為智慧嗎？
有好好用嗎？係幫緊自己，定害緊自己呢？
可問問自己：
- 有用學返嚟嘅知識嚟懶叻/滿足虛榮心嗎？
- 有用「瑜伽話」嚟單打/攻擊人嗎？
- 有貪快/貪心，想學快啲/學多啲嗎？
- 有狂上瑜伽班、狂報課程嘅嚟掩飾/麻醉自己嗎？
- 教瑜伽嘅，係咪用緊個「小我」去教呢？咁到底係教緊瑜伽（真知），還是「小知」？
筆者一路寫，都一路反思（鞭打緊）自己。
如果咁啱，睇緊的你是教瑜伽、學瑜伽的，值得一齊深思。
未走歪的，唔好沾沾，繼續把持；要回頭的，回頭總有岸。
共勉，共勉。