About Kristen
身心靈｜瑜伽：一齊練 / 一齊學 / 一齊行
以身調心，以心繫靈。
如果冇接觸過瑜伽，我大概還在飄飄蕩蕩，繼續鑽著牛角尖地活得不明所以。唔會明白身心靈健康嘅重要，亦唔會學到原來治癒身心靈嘅步驟係實實在在，同生活咁近。
同大部分年青人一樣，過去我好受朋輩及大環境帶動。感情用事亦情緒化，十分醉心沉溺於自我營造嘅圍爐氛圍中：多愁善感、憤世嫉俗，彷彿有種越沉溺越快樂嘅自虐傾向。
喺瑜伽嘅教導中，我睇到自己呢一面，睇到自己曾經係一位好傻、慣性情緒勒索自己嘅暴風女孩。最得意嘅係，當今天再重溫昔日往跡時，泛起嘅係一種既陌生又憐憫嘅情感。唔識得嗰個自己，但我明白佢。
瑜伽帶我睇到原來自己同任何人都一樣，都係值得同足夠的。
時至今日，學習嘅路仍好長遠，但我知道，有顆啱嘅種子，正慢慢生長。