1. 前言：處處都是瑜伽智慧

機緣巧合睇到講莊子嘅書，無獨有偶，翻到「肯定真知」章節，論述莊子點睇「知識」嘅觀點。

佢提到嘅「小知」，就好似我哋講嘅「小我」。一路睇，就愈體會到處處都係 #瑜伽智慧，源遠流長，只係以前唔識，所以睇唔到。在此分享一下。

2. 咩係「小知」？

「小知」即係來自世俗嘅知識，多為適時應世嘅口耳之學。即係，為存活而揀嚟學嘅知識。

例：我哋由讀幼稚園到大學，課程架構入面學嘅所有知識，都係為咗大個出嚟社會做個「有用之人」而學的。

2.2 來自小我嘅小知

莊子曰：「是其所非，而非其所是」（〈齊物論〉）

呢類「知」指自以為是、流於狹隘、片面嘅主觀認知，亦係帶住個人執迷同成見嘅「知」。

通常都伴隨二元對立/二分法嘅思維模式。

例：

* 你做法我唔認同，所以你一定係錯嘅。

（見另一半講嘢唔順耳，就立即發脾氣要指正人，去證明自己先係最啱嘅，就係從小我衝出嚟嘅小知）

* 由細到大，阿媽覺得做得成醫生就係出路，做唔成醫生就係死路。長大後，我都覺得係咁。

（阿媽認為呢個世界除咗醫生就冇其他理想職業，而我被潛移默化，困在阿媽小我嘅小知）

3. 「小知」日常慣常用法

3.1 用嚟「威威」、「鬧人」：

莊子曰：「知出乎爭⋯⋯知也者，爭之器也。」（〈人間世〉）

有唔少人自覺學有所成後，都有一種「我勁過你」嘅沾沾念頭。一個唔小心唔見咗個初心，個人就變囂張，就會好易出口術用「學識」嚟誇耀自己、攻擊別人，引起不必要嘅是非爭辯。

例：

上次男友做咗件我好唔順眼嘅事，我心想：枉佢學莊子學咗咁多年，等我以子之矛攻子之盾，用莊子學說教精佢啦。男友自覺被單打後又唔岔氣，一心想反擊我。

（最後，基於呢種非我即敵嘅小我心態，雙方都只為表現自己係最叻嘅，爭辯既沒營養又沒意義，卻沒完沒了。）

3.2 用嚟「欲求」：

呢一類「知」又係「感覺之知」，知識嘅追求，由感官享受帶嚟嘅刺激與欲望所驅使。

例：

我鍾意食好味嘅嘢，上多啲烹飪班學多啲煮嘢食嘅知識。煮煮吓啲朋友就叫開始叫我廚神，我亦開始享受被人知道我鍾意煮嘅感覺，慢慢無咗原本純粹享受煮的初心。

呢種低覺知嘅感覺之知會令人「求」極都唔夠，愈嚟愈多想要嘅欲望，容易令人捨本逐末，危險！

4. 求知求學，請把持謙虛良善嘅初心。

學任何事，用小我去學，學嚟嘅就係小知。 

教的人，用小我去教，教出去嘅，亦係小知。 

時刻把持初心，定時定候就可問問良心：

「我學/教緊啲咩？」 

「我到底為咩而學/教？」 

「我有冇善用所學所知？」 

「我有冇虛耗/濫用所學所知？」

尤其是學了某一類自以為好鍾意、好誠心學的知識與技能，更加要自發警醒自我呢。

5. 瑜伽寄語：讓正念Mindfulness成為日常的處世之道

「小知」、「小我」名嚟㗎啫。說穿了，都係一堆加深個人情緒糾纏、加強偏執嘅思維陷阱🪤，亦係無數「不幸」周而復始嘅根。

瑜伽學嘅正念（Mindfulness），正是培養分辨是非虛實嘅覺知，學習從「小我」（情緒/執念）抽離，提升如實覺察當下嘅能力，減少日常生活中不必要嘅思想拉扯。少啲被情緒幻覺牽引，日常做嘅決定、講嘅說話都更明智，人都sharp醒啲！

相關文章：

【瑜伽概念】了解與反思瑜伽作為一套實在的「真知」、「無我」的身心靈實修法