7個關於書寫的自白：提醒自己誠實書寫的重要！
- 平衡心輪（Anahata / Heart Chakra）與喉輪（Vishuddha / Throat Chakra）
- 訓練右腦，提升生活感知
- 不儲新的情緒垃圾，清理舊的心事
- 進入自我了解的療癒之門
- 減少做無謂事情的時間
- 靠近真誠的心
- 讓文字慰藉與溫暖人心
平衡心輪（Anahata / Heart Chakra）與喉輪（Vishuddha / Throat Chakra）
心輪（Anahata / Heart Chakra）同喉輪（Vishuddha / Throat Chakra）點練？
寫嘢就係其中一個練嘅方法喇。力度比起做個超級無敵大後彎到肉呀。
做式子要打開個身體先做到，寫嘢就要打開個心扉先寫到。啲energy由個心肝仔行到上個喉嚨。
誠實地書寫，係一個好好梳理/整頓思緒嘅過程，係平衡心輪嘅好練習。呢個過程，可以好好清洗心入面嘅垃圾，令心騰出空間去接納，去分享，去愛，自己。久而久之，對自己，對人哋，都慢慢會有同理心。
喉輪主溝通同表達。喉輪練得好，個人會冇乜多餘嘅說話（少廢話），自然喺適當嘅時間講適當嘅野；字字鏗鏘有力，講嘢有說服力有影響力。喺瑜伽，好強調「實語」*，講真心誠意嘅說話，用心去講嘢。誠實地書寫，又係練緊呢樣嘢呢。
乜原來寫嘢咁多好處㗎咩？我都係寫寫吓先梳理好自己係點睇「要寫嘢」呢回事。就係咁喇！
*Patanjali《瑜伽經》中，八肢瑜伽嘅第一肢，「持戒（Yama）」中嘅「實語（Satya）」。
訓練右腦，提升生活感知
有一種人，問佢乜嘢，佢都會話冇乜嘢。
例如：
「嘩，今日個天好靚呀。」係咩，冇乜特別呀。
「今日阿邊個話乜乜乜，好癲，點解會咁樣講嘢嘅？」唔，我覺得冇乜嘢呀。
「你睇完呢本書喇？覺得點啊？」我覺得幾好吖，冇乜特別。
「不如你試吓寫個post講XXX？」我唔知可以寫咩呀。
呢種人呢，講其他嘢好多嘢講，好多無關痛癢嘅意見可以發表的。但一問到佢嘅感受、感覺、同佢個人情感有少少關連嘅嘢時，佢哋就「冇乜嘢」嘅。
唔通，佢哋真係對生活冇乜感受？就係悶啲咁樣？曾經我都以為係有啲人會係咁樣的，但後來改變咗諗法。
（撇除天生悶蛋）通常呢一類有後天悶蛋特質嘅人，都築起咗道厚厚嘅心牆，怕有感受，怕投放情感，怕有連繫，怕錯，怕被批評，怕受傷。應該都係有啲心事未好返之類。
佢哋會好刻意地淨係用理性去思考去生活，長期放低個右腦，非常有可能會慢慢變成又悶又冇同理心嘅機械人。
練寫嘢練創作，試吓記錄日常、寫自己嘅感受，呢種練習係好好訓練返個右腦，可以搵返對creative eyes，搵返對生活嘅好奇心同投入感，搵返個靈魂。
再慢慢，當愈抒發愈流暢時，一啲心底裡嘅陳年往事又可能浮到上面，順手寫埋又一件件揼低，人又輕盈啲。
寫吓寫吓，係一定會有變化的。
隨住對生活嘅感知慢慢提升，個人又會有血有肉返啲，會慢慢可以用心感受，用心說話，用心做事。做人都會開心啲，有活力啲，順利啲。
不儲新的情緒垃圾，清理舊的心事
睇戲有睇過有啲人好唔開心/好嬲/收埋啲秘密收埋得好辛苦時，會寫低佢，一係埋咗佢，一係一把火燒咗佢，之類？
放低，有好多種方法。
每日每時每刻，我哋都喺度接收同發放緊能量/ Prana（眼耳鼻舌身（五感）），即係情緒。
有時未必知嘅，就算當刻冇影響到乜嘢，但感受有喺度就係喺度。自己主動去搵個位放低佢哋，總好過由得佢哋自生自滅留喺個心肝度，唔知邊日走出嚟搞亂檔。
主動寫出嚟係其中一個好方法。
恆常地寫，係建立緊一種流露、表達嘅心態/習慣。
唔使一定係大事先值得寫低，無關痛癢嘅小事都無妨。可以係睇見路邊一朵花好靚，loop到一張舊相，突然諗起嘅一個畫面，今日著嘅衫，琴晚餐飯。日常生活嘅所有都可以寫吓。唔理咩感受，只要係真感受，都可以寫。
寫嘅形式都係隨心，靈感大爆發千字文不拘，是但講兩句又得，興起作首詩都可以。
咁樣主動去做，唔儲新嘅心事，咪慢慢清理舊心事囉：）
進入自我了解的療癒之門
寫嘢係一個好好了解自己嘅療癒過程。
睇一個人點寫嘢，就知呢個人咩料子。係真嘅。睇人寫，又睇到自己。
試咗寫，可能會發現原來好難落筆/寫嘅十句得一句重點/原來自己有某啲傾向，可能係逃避，可能係驚錯，可能係作狀，唔知道。（寫唔出嘢又係另一種常見嘅情況，下次講下）
舉個例，以前我寫字鍾意雕花的。
其一，咁由細到大被教「作文技巧」「寫作風格」係咁㗎嘛，搞到而家寫自己嘢時都仲有條好長嘅雕花尾巴跟住。其二，我想匿埋又驚錯，人哋睇唔明白我寫嘅嘢就好囉，又顯得我高深，寫到有時自己都睇唔明。哈哈！
咁我嘅功課就係要花喺呢度喇，寫得直白坦誠啲。
「我手寫我心」嘛，係好老土㗎啦。寫嘢係其中一個靠近心嘅途徑，愈自然流露，心就愈得以舒懷，了然。
寫出嚟一次，就好似屙一次屎咁，幾好。有時屙靚屎，有時屙爛屎，有時屙水。
屙咗出嚟有形有相，有得睇，有得醫，又舒服。
減少做無謂事情的時間
得閒嘅時候唔寫嘢，啲時間會用嚟做啲咩呢？
食嘢？瞓覺？碌IG？都係嗰啲囉。
老師突破盲點話，啲時間唔做呢樣嘢嘅時候都會用嚟做另一樣嘢，點解唔做一啲對自己有益嘅事？
係囉，啲時間係得咁多，刻意做多啲有益嘅事，就冇咩時間做冇益嘅事。個人會慢慢變好。
呢個理由好充分，好值得啵！
返工以外，而家我每日一定做嘅嘢有鋪床、沖凍水涼、寫嘢、聽咒、168、摸貓餵貓錫貓；恆常會做嘅有瑜伽練習、睇書、睇戲、長啲嘅斷食、影相、煮嘢食、教班。
做咗以上嘅嘢，我都仲有好多時間做無謂嘢的。
做晒以上嘅事一段日子，我都仲未撇甩到懶惰同隨性嘅尾巴！唔做仲得了嘅？
做啦！ 要做嘅嘢做咗先！
靠近真誠的心
「真誠才是最大本領」係一句我好鍾意嘅歌詞。
呢幾年，我希望自己係一個真誠嘅人，希望身邊嘅人都可以真心待人，希望個社會都可以真誠啲。
真誠，真摯，純粹，真。成日掛住喺口邊嘅呢幾個字，到底係講緊乜嘢？
呀，原來我從來冇認真諗過喎。
吓？
一直都希望自己係一個真誠嘅人，又想人哋真誠啲，凡事都話要求真要真相，但係原來自己都唔知個「真」係乜嘢嚟？
係真係咁㗎喎。
人真係咁怪㗎喎。原來。
今日對「真誠」嘅啟發，係瑜伽練習同埋誠實書寫帶畀我嘅。
回顧呢幾年寫嘢嘅過程，終於慢慢發現，原來自己都唔係一個好真誠嘅人。哈哈！因為，如果已經活得真誠，寫嘢嘅時候就唔會有顧慮、有包裝、有我執啦。
當自己一直以為嘅真，原來都唔係真嘅時候，過去我嘅世界，到底建構左幾多唔真誠嘅嘢出嚟呢？自己呃自己，又畀人呃，又呃返人哋？
寫嘢，係其中一個面向令我睇到。
好彩有寫。
嘩。想活得坦蕩蕩，真係一啲都唔容易。
共勉之。
讓文字慰藉與溫暖人心
當大環境係充斥憤怒、動盪、不安、猜疑時，書寫變得更重要。
回望某年每日每夜睇數之不盡嘅評論、分析、圍爐文。除咗自願加深、刻意記住某種情緒而不斷睇嘅文字，某啲文字有強大嘅慰藉力量，亦有無數次成為當時嘅我，「唔好死」嘅動力。
文字可慰藉人心。呢股力用得啱，寫嘅人，睇嘅人都可以受到呢股力而止痛，可能會撥開到啲雲霧，可能會做少啲傻事，可能會錫自己同身邊人多啲。
當年因為工作，我有理所當然地寫。亦好慶幸，該年，我喺一笪同呼同吸嘅地方工作。亦學到，那個時候嘅文字要謹慎，要真誠，要和煦，因為那時候的文字，有責任，係對外發出嘅聲音。
那眼耳鼻舌身疲勞爆炸嘅時期，唯二我會一口咬定對自己做得啱嘅事係，瑜伽同編寫。
係，嗰時大部分時間嘅我只係編寫。
如果可以，我會返去再寫多啲，再練多啲。儘管，到今天大家都仍不知道對與錯在哪裡；又儘管，那時嘅我並不如我想像般真誠。
又如果，如果當時能寫多啲，寫得再真誠和煦啲，或者，我嘅心事，就不用陪伴我三年之久。