講吓寫嘢。
久遠嘅post有提過，由細到大都冇咩叻，又冇咩特別鍾意嘅嘢，唯獨是寫作，係由中學到而家都會做嘅事，而我又幾樂在其中。
中學的寫：享受為數分努力
因為細個有被偷睇日記簿後被鬧嘅經歷，我再冇寫日記嘅習慣。中學嘅寫作，係功課測驗考試形式的，可能係因為寫得高分所以想繼續寫，都係為由成績嚟嘅滿足感。老師都好好的，好用心批改，會細睇內容，幾乎每篇都會寫comment，話畀我哋知有咩可以改善，又或是回應文章嘅內容，好似傾偈咁的。我好鍾意睇feedback，覺得手寫畀我嘅字好特殊，係一種被看見、有溝通、有回應嘅互動。有好多中學時期嘅作文我都唔捨得扔掉（終於喺早年搬家掉了）。
呢一種寫，係有目的，有主題，有對象的，有分數的。
大學的寫：看見文字的闊度與深度
以前讀寫作好得意，印象中係全個課程都冇教過人點書寫。瘋狂賞析文本、影像、錄像，然後叫你創作同分析。
去到大學我都繼續寫，走咗去讀寫作。
呢種寫有啲唔一樣。雖然都係有目的，有主題，有對象的，有分數，但創作嘅成份高好多，框框大好多，更接近日常。記得係，有一課名叫「食物、酒、旅遊」（好似係），我哋會試吓即堂醃製一啲食物、品嘗紅酒，然後為呢個經歷或是製品寫作。
又有一課是寫英文詩的，在此之前我未學過寫英詩，覺得好似好型好勁就走去報課。結果都係好深刻嘅體驗。每課交一首詩作功課，每位同學都要把功課print成十多份，派給每位同學，堂上會由同學讀出自己的詩，然後所有同學一齊討論，並寫下留言送回該同學。除了得到一堆同學的回應，得著更大的是，明白創作本身嘅包容同可能，根本冇好同唔好。
分數是主觀目光。
但呢個時候，當然我都唔能夠太明白同太享受，因為我都要畢業要考試，都係一種有壓力嘅寫。
工作的寫：扮演不同的聲音
好啦，畢業出嚟做嘢啦。
我又走去搵份同寫嘢有關嘅工。我做過媒體、醫療、教育，媒體工作嘅寫作訓練對我嘅影響係好深的。寫故事，要有溫度，有人味，點樣作狀得嚟又要不經意，點樣寫一堆令人有共鳴、可以溫暖人心嘅字。
唔單止係字，仲學埋影相，做訪問，因為要學呈現一個立體嘅故事。
2018-2020喺呢度做嘢，再回望，依然感激呢個最好嘅安排。
故事入面唔止有公司嘅視角，亦都有我喺入面。
嗰兩年我寫咗好多social media post，寫咗好多本來唔知嘅事物，知道原來文字係可以咁用的。講到呢度就好想多謝我位senior阿姐，一位暫別嘅友人。之後轉工我再冇遇過重視文字嘅上司/ 公司，返工寫嘅嘢十常八九，「做好件事」、「做好本分」就係咁囉。
對呢刻嘅我嚟講，工作層面嘅寫，你想要咩都得。
自己的寫：學習把心寫出來
枝筆向外咗咁多年，原來最大嘅挑戰同有得著嘅，係向返內，寫自己。
兩年前開始開配圖寫social media post，今日重溫，淨係睇圖都感覺到個自製嘅距離感。IG@breathewithkristen
「你」想要咩都得。咁我呢？
係囉，點解咁蠢成日幫人寫都唔幫吓自己寫㗎呢？三年前開咗個「瑜伽IG」，兩年前開始寫吓自己啲心事，今年開始寫吓瑜伽（同埋瑜伽揭曉嘅心事），重新學過如何寫得坦然。
寫嘢係好好了解自己嘅方法。
係好難的。喺呢個語境，我唔再需要係任何人，諗咩就寫咩：更加知道自己係幾混亂幾跳掣幾唔穩定，又成日想匿埋。
近月寫嘅post比以往嘅文字、配圖都唔同咗好多。呢個人明顯開懷咗，色彩都多咗。IG@breathewithkristen
西方一早話writing as therapy。寫咗咁多年，我好似都係今年先真正身同感受。大事寫、小事寫，志在表達同流露，畀內心多一個渠道舒懷。
#重新學寫 #讓書寫為自己的療癒練習
#瑜伽 #breathewithkristen