改善呼吸：擴闊胸肺空間與訓練核心肌群
你哋知道能夠覺察到自己嘅一呼一吸，並唔係一件容易嘅事嗎？
人一出世就識「唞氣」，無啦啦又點會懷疑自己唔識得「呼吸」，無啦啦又點會質疑自己呼吸得好唔好呢？更唔會無啦啦feel住個吸氣同呼氣，睇啖氣點樣流動、經過身體邊一個部分，點樣開始，點樣結束。但，以上都係練瑜伽嘅重要一步啊。
「呼吸唔連貫」一啲都唔罕見，更多人係呼吸短淺、喘促、飄忽不定。
一次呼吸，其實用緊身體十幾廿嚿肌肉。係十幾廿嚿。上網搜尋「呼吸」就會見到了。
意思係，完整地呼吸一次，係有好多組肌肉一齊參與，伸展同收縮。想用盡原本嘅呼吸空間（胸肺嘅空間），呢一堆呼吸肌肉需要有足夠嘅伸縮能力，夠彈性，夠強壯。換言之，呼吸肌肉鍛鍊對呼吸質素有直接正面嘅影響。調返轉，如果呢堆肌肉好耐都冇好好郁動，漸漸失去彈性，呼吸嘅空間就會愈嚟愈細，造成「呼吸短淺」、「喘促」、「飄忽」嘅狀態。要留意嘅係，身體仲好「叻」的，為咗幫你做到要做嘅嘢，有個自動嘅補償機制，原本要用嘅肌肉唔係好用到，就會用多啲輔助肌，去「幫」你呼吸。都未計日常生活嘅壓力、壞習慣、壞姿勢。好慘烈地，唔應該萎縮的萎縮，唔使發達嘅過分發達。
改善呼吸由鍛鍊核心肌群開始。
腰大肌（psoas major muscle）位於第十二胸椎同腰椎上，連接分隔胸腔及腹腔嘅橫膈膜，同時連接盆骨嘅胯屈肌群同大腿內收肌群。完整嘅呼吸可以按摩晒呢一堆肌肉，同樣地，呢一堆肌肉嘅健康，直接影響住呼吸嘅深淺、質素。呢度講嘅，都不過係身體機能嘅運作，維持生命嘅狀態而已。
腹式呼吸法（Diaphragmatic breath）、完全呼吸法（Yogic breath）、發聲（唱歌/梵唱（Chanting）、砍柴（Woodchopper exercise）、甚至大笑，係用緊最溫柔嘅方式按摩、啟動、訓練緊呢堆呼吸肌肉。正確有意識嘅呼吸技巧，加上循序漸進嘅核心肌群鍛鍊練習，係調整同修復機能嘅第一步，亦都係調節身心嘅開始。
#腰大肌 #呼吸法 #呼吸空間 #breathewithkristen