牛面式 Cow Face Pose：

愈難耐的瑜伽練習 愈要好好呼氣

唔知由幾時開始，我最唔想做嘅式子，係cow face pose（牛面式）。

唔想做/唔鍾意/好痛苦。

做cow face時，係由盤骨尖叫到心口上到喉嚨，想走佬嘅無聲吶喊。係一種覺得自己好可憐好淒涼嘅情緒。身體每一個呼氣、沉低，心入面都叫一次救命。

係因為身體好緊，筋唔夠鬆，做唔到嗎？唔係呢。整個式子嘅表面動作都完成好的。按照表面模樣，旁人係唔會去估呢個人原來做得咁辛苦的。

練習任何瑜伽式子(Asana)時值得注意嘅事：

1）你哋練式子時有過唔同嘅情緒嗎？苦/酸/扯/痛/嬲/炆/唔耐煩/想走佬/想匿埋？有啲感受可能最終結果都令到你想尖叫想喊，但佢哋係唔同嘅情緒嚟。學習覺察，再分拆，都係好好嘅瑜伽練習嚟。

2）練瑜伽最微妙最powerful嘅真係唔係眼見到嘅肢架，而係人哋睇唔到嘅，得自己先感受得到嘅嘢。

咁點解我會做得咁辛苦呢？唔知啵。就係身體儲儲埋埋嘅情緒廢物、啲等住被排放嘅垃圾回憶掛。咩都好，總之，如果咁好彩遇到啲唔想做/唔鍾意/好痛苦嘅式子，分清楚係皮肉嘅苦，定係情緒嘅痛；知道喺皮肉唔會受傷嘅情況下，好好做，送多幾個呼氣畀嗰度，一定會慢慢好的。

我知道cow face係醫緊我個心肝仔。所以，幾唔情願我都會好好做㗎。

你哋都要。

#breathewithkristen #牛面式 #cowfacepose #瑜伽